د اوکراین او روسیې ترمينځ په بريدونو کې دواړو خواوو ته مرګژوبله اوښتې ده.
د اوکراین هوایي ځواک د اپرېل پر ۲۹مه ویلي دي چې روسیې یوازې په تېرو ۲۴ ساعتونو کې پر اوکراین ۱۰۰ بې پيلوټه الوتکې توغولې دي.
په دنیپروپېتروفسک سیمه کې د دغو بریدونو په پایله کې يوه ۱۲ کلنه نجلۍ وژل شوې او درې تنه نور ژوبل شوي هم دي.
بلخوا روسيو چارواکو ویلي دي چې په بېلګورود کې پر یوه موټر د اوکراینيو ځواکونو په برید کې دوه روسان وژل شوي او درې نور ژوبل شوي دي.
دا په داسې حال کې ده چې د روسیې ولسمشر له اوکراین سره درې ورځنی اوربند اعلان کړی دی.
دغه اوربند به د مې له اتمې تر ۱۰مې پورې نافذ وي چې د نازي جرمنانو په وړاندې د شوروي اتحاد د بریا له ۸۰مې کلیزې سره برابرې ورځې دي.
بلخوا د اوکراین ولسمشر د پوتین دغه اعلان نمایشي بللی دی.
