چارواکي وايي، د بلوچستان په نوشکي ضلع کې د تېلو په ټانکر کې د چاودنې له امله له لږ تر لږه ۷۰ کسان ژوبل شوي دي.
ضلعي پوليس چارواکو رسنيو ته ويلي دي چې د اپرېل پر ۲۸مه د ټرکونو په ډېپو کې د وېلډېنګ پر مهال د تېلو يو ټانکر اور واخيست چې سمدستي وروسته موټروان (ډرېور) د احتمالي خطر د مخنيوي لپاره هغه ټانکر هوارې سيمې ته ورساوه.
د پوليسو په وينا، پر دې مهال يوشمېر کسان راغونډ شول او کله چې د اور وژونکې ادارې کارکوونکي د ټانکر په اور وژنې بوخت ول نو د ټانکر ټانک (ټېنکۍ) وچاودېد او ګڼ کسان ژوبل شول.
تر دې وړاندې، د نوشکي انتظامي مشر (ډېپټي کمېشنر) امجد حسين سومرو رسنيو ته ويلي ول چې د شارټ سرکټ له امله ټانکر اور واخيست او بيا وچاودېد.
چارواکي وايي چې د ټانکر ډرېور پر هغه ځای د زياتو ټپونو له امله ومړ او نور ژوبل کسان سمدستي د نوشکي ضلعي روغتون ته ورسول شول چې بيا وروسته ۳۷ زيات سوځېدلي کسان د کوټې ضلعي روغتون ته يووړل شول.
پر ټولنيزو شبکو يوشمېر کسانو په ټانکر کې د چاودنې ويډيو خپره کړې ده.
د کوټې روغتون چارواکو ويلي دي چې د ۸۰ سلنې سوځېدو له امله د ۱۰ ژوبلو کسانو روغتيايي حالت د اندېښنې وړ دی. بلخوا د ژغورنې او مرستندويه چارو ادارې چارواکي وايي چې ۲۰ جدي ژوبل کسان به د درملنې لپاره کراچۍ ته وړي.
د بلوچستان اعلاوزير سرفراز بګټي د اپرېل پر ۲۹مه د کوټې په سېول روغتون کې د ژوبلو کسانو د پوښتنې پر مهال وويل چې که اړتيا پېښه شوه نو حکومت چمتو دی چې جدي ناروغان په الوتکه کې کراچۍ کې منتقل کړي.
د بلوچستان حکومت وياند شاهد رند ويلي دي چې په ژوبلو کې څلور پوليسان او د اور وژونکي ادارې کارکوونکي هم شامل دي.
