پاکستان بنګلادېش ته د کرکټ په دويمه ۲۰ اووره لوبه کې په ماتې ورکولو سره د درو سياليو لوبلړۍ ګټلې ده.
د لاهور په قذافي لوبغالي کې د مې پر ۳۰مه شوې سیالۍ کې پاکستان لومړی توپوهنه وکړه او په ټاکليو ۲۰ اوورونو کې يې د اووه لوبغاړو په زيان ۲۰۱ منډې وکړې.
په ځواب کې د بنګلادېش ټول لوبغاړي د ۱۹ اوورونو تر لوبولو وروسته وسوځېدل او ۱۴۴ منډې يې وکړې.
تر دې وړاندې، د مې پر ۲۸مه هم پاکستان بنګلادېش ته په لومړۍ ۲۰ اووره لوبه کې په ۳۷ منډو ماتې ورکړې وه.
دواړې لوبډلې به د ۲۰ اووره لوبلړۍ درېيمه او وروستۍ سيالي د جون پر لومړۍ نېټه په لاهور کې کوي.
په پاکستان کې تر دې وړاندې، د پاکستان سوپر لیګ (پي اېس اېل) په نوم د ۲۰ اووره کرکټ د ۱۰م پړاو سیالۍ تر سره شوې چې پايلوبه يې د مې پر ۲۵مه د لاهور په قذافي لوبغالي کې وشوه.
په هغه سيالۍ کې لاهور قلندرز کوټه ګلېډيېټرز لوبډلې ته په ماتې ورکولو سره د پي اېس اېل د ۱۰م پړاو سياليو اتله شوه.
