په افریقايي هېواد کانګو کې پر یوې کلیسا په وسلوال برید کې لږ تر لږه ۲۱ تنه وژل شوي دي.
اسوشيېټېد پرېس او رویټرز اژانسونو ویلي دي چې پېښه د جولای پر ۲۷مه شپې شاوخوا یوه بجه د هېواد په ختیځ کې په کوماندا سیمه کې شوې ده.
اسوشيېټېډ پرېس اژانس د دیودونې دورانتابو په نوم مدني ټولنې د یو مشر په حواله ویلي دي چې د متحدو ډېموکرټیکو ځواکونو په نوم د ډلې وسلوالو د کلیسا په انګړ کې برید وکړ او په سیمه کې یې څو کورونه او دوکانونه هم سوځولي دي.
اژانس وايي، اسلامي دولت (داعش) د هغې وسلوالې ډلې ملاتړ کوي.
د مدني ټولنې هغه مشر وايي چې وسلوالو د کلیسا دننه او بهر خلک وویشتل.
هغې وسلوالې ډلې روانه میاشت په اېتوري سیمه کې لسګونه کسان ووژل. د ملګرو ملتونو ویاند هغه پېښه د "ګڼوژنې" په نوم یاده کړې وه.
