د پاکستان په کراچۍ ښار کې د ګمرک چارواکي وايي، چين ته د خرو ۱۴ ټنه قاچاقېدونکي پوستکي يې نيولي دي، چې ارزښت يې شاوخوا ۸۰ کروړه (۸۰۰ مېليونه) پاکستانۍ روپۍ ښوول شوی دی.
د ګمرک ویاند سید عرفان علي د مې پر دويمه رسنيو ته په استولي بيان کې ويلي دي چې دا پوستکي د څرمنو د نورو توکو په پلمه چین ته صادرېدل او بېړۍ ته يې د پورته کولو اجازه هم ترلاسه کړې وه چې ونيول شول.
نوموړي زياته کړه، د ګمرک چارواکو د څرمنو له بارولو مخکې تفصيلي پلټنه وکړه او بيا وروسته معلومه شوه چې دا د خرو ممنوعه پوستکي دي.
د بيان له مخې، د پاکستان د صادراتو (برامداتو) تګلارې له مخې، د خرو د پوستکي (پوست يا څرمن) پر صادراتو باندې بندیز لګول شوی دی.
سید عرفان علي وايي چې دا لومړی ځل نه دی چې له کراچۍ څخه چین ته د خرو د پوستکو د قاچاق هڅه شوې او ونيول شوي دي.
د هغه په وينا، له دې وړاندې هم د روان ۲۰۲۵ز کال په اپرېل مياشت کې د کراچۍ په قاسم بندر کې او له هغه مخکې د ۲۰۲۴ز کال په سېپټېمبر میاشت کې د خرو د پوستکو یو لوی مقدار چین ته د قاچاق پر مهال نیول شوی وو.
چين ته پر پاکستان سربېره له يوشمېر نورو هېوادونو څخه هم د خره پوستکي لېږدول کېږي.
داسې انګېرل کېږي چې چين د خرو له پوستکي يو ډول درمل جوړوي.
