روسیو چارواکو او پلټونکو د هېواد په ختیز امور سیمه کې د الوتکې پرېوتو په پېښه کې د پینځو ماشومانو په ګډون د ۴۹ کسانو وژنه تایید کړې ده.
د سیمې والي واسیلي اورلوف د جولای پر ۲۴مه تر پېښې څو ساعته وروسته د وژل شویو له کورنیو سره خواخوږي وښووله.
نوموړي په بیان کې ویلي، "د لومړنیو معلوماتو پر اساس په خپګان وایم چې په تېندا ولسوالۍ کې د اېن-۲۴ الوتکې د پرېوتو په ځای کې هېڅوک ژوندي نه دي پاتې."
انتونوف اېن – ۲۴ الوتکه د جولای پر ۲۴مه له بلاګووېشچېنسک ښاره د تېندا پر لوري روانه وه چې له راډاره ورکه شوه.
څو ساعته وروسته چارواکو له ښاره شاوخوا ۱۵ کېلومیټره لیرې په ځنګله کې د الوتکې ټوټې وموندې.
د بیړنیو چارو وزارت وايي، ژغورونکې ډلې لومړی د سیمې د سختې جغرافیې له وجې د پېښې ځای ته په رسېدو کې له مشکلاتو سره مخامخ وې خو بالاخره هلته ورسېدې.
وزارت په بیان کې وویل، هغوی په سیمه کې د لټون عملیاتو ته دوام ورکړی دی خو هېڅوک ژوندي نه دي پاتې.
د امور سیمې والي اورلوف ویلي دي چې په الوتکه کې ټول ۴۹ تنه سپاره ول چې شپږ یې د عملې غړي ول.
لومړني راپورونه وايي چې الوتکه ښايي د پیلوټ د تېروتنې له وجې پرېوتې وي ځکه چې په تېندا کې موسم خراب وو او د دید ساحه خورا محدوده وه. راپورونه وايي، پیلوټ تر دې مخکې پر هوايي ډګر د کوزېدو هڅه کړې وه خو بریالی نه شو.
تر دې مخکې د روسیې انټرفیکس اژانس هم د بیړنیو خدماتو ادارې د سرچینو، چې نومونه یې نه دي ښوولي، له خولې ویلي چې د پېښې پر مهال په سیمه کې موسم خورا خراب وو.
اسوشيېټېډ پرېس اژانس زیاتوي چې روسیو چارواکو د پېښې پلټنې پیل کړې دي.
اېن-۲۴ الوتکه د پخواني شوروي اتحاد له وختونو کارېږي او تر دې مخکې یې هم د خوندیتوب په اړه پوښتنې او اندېښنې وې.
